«Күн кыырпаҕын ыспахтаан…» : кинигэ сүрэхтэниитэ

Алтынньы 5 күнүгэр Олоҥхо дьиэтигэр Бүлүү киин библиотекатын тэрийиитинэн «Күн кыырпаҕын ыспахтаан…»  диэн ааттаах Константин Романович Харлампьев хоһооннорун  кинигэтин сүрэхтэниитэ буолан ааста.

Күндү ааҕааччым, Константин Романович Харлампьевы билэҕин дуо?

Константин Романович Харлампьев Бүлүү куорат төрүт олохтооҕо, идэтинэн суоппар, дууһатын ирдэбилинэн хоһоонньут. Дьон үксэ кинини Костя Харлампьев диэтэххэ билэр.

Киэҥ эйгэҕэ биллибэккэ сылдьыбыт саҥа  ааптар — «Күн кыырпаҕын ыспахтаан…» диэн хоһооннорун бастакы кинигэтин сүрэхтэниитэ алтынньы ый 5 күнүгэр Олоҥхо дьиэтигэр буолан ааста.

Сэмэн Маисов маннык суруйбуттаах:

«Хоһоонньут – хоһооно өйдөннөҕүнэ,
Уус куоластаах сатаан аахтаҕына,
Этиллибит санаа толору тобулуннаҕына –
Ол – хоһоонньут дьоло…» диэбит.

Константин Романович хоһоон суруйуутунан 1987 сылтан умсугуйан дьарыктаммыт эбит. 30 сылы быһа иитиэхтээн сылдьыбыт санаалара айбыт аҕаларыттан арахсан, хоһоон хомуурунньуга буолан туспа дьылҕаланаллара, кырдьык даҕаны дьоллоох түгэн буоллаҕа. Кини айар үлэтин сэҥээрээччилэр – кинигэ пропагандистара улуус нэһилиэктэриттэн эрэ буолбакка, Дьокуускайтан тиийэ кэлбиттэр.

Улуус баһылыга С.Н. Винокуров, эһиилги Бүлүү куорат 385 сыллаах үбүлүөйүгэр ананан тахсыахтаах кинигэлэр ааннарын аспытынан, Махтал сурук, Бочуотунай грамота, туттарда, Константин Романович айар үлэтин туһунан бэйэтин санаатын үллэһиннэ.      

Хампаҕа «Далбар”, улууска “Бүлүү сарыаллара” түмсүүлэр салайааччылара хоһоонньут Анна Дмитриевна Чиркова уран дууһалаах, суруйар талааннаах түмсүүтүн дьонун кытта хайдах үлэлиирин сырдатта.

Салгыы сонун көрүүлэрдээх, сонун кинигэ эрэдээктэрэ Дьокуускайтан сылдьар Парасковья Никифоровна Павлова Костя Харлампьев хоһооннорун, айар талаанын арыйда, ырытта.

Бар дьоно Константин Романович сахалыы толкуйа тобуллаҕаһын, тыла баайын бэлиэтээтилэр, салгыы айар-тутар дьоҕура сайда турарыгар баҕардылар.

Автор,  кинигэтин улуус үбүлээн таһаарбытыгар, хоһооннорун  ааҕааччылар  истиҥник ылыммыттарыгар ис сүрэҕиттэн махтанна.

М. П. Дмитриева, кыраайы үөрэтиигэ кыл. бибилэтиэкэр, Бүлүү к.


Навигация: Вернуться на главную страницу

Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь