Кинигэ билии-көрүү бараммат байҕала, өй-санаа уостубат кылаата. Киһи көлүөнэттэн көлүөнэҕэ, үйэттэн үйэҕэ муспут баай уопута, билбитэ-көрбүтэ барыта кинигэҕэ тиһиллэр. Ол иһин кинигэттэн ааспыт үйэлэри билэбит, кэлэр кэмнэри сабаҕалыыбыт.
Кинигэ баар үтүөҕэ-кэрэҕэ үөрэтээччи, киһи дууһатын байытааччы, санааны күүрдээччи-күүһүрдээччи, билии биэрээччи, үтүө санааны угааччы.
Куорат 23 нүөмэрдээх библиотека-филиала 1991 с. куорат соҕуруу өттүн ааҕааччыларын кинигэннэн хааччыйар сыаллаах тэриллэн үлэлээбитэ.
Библиотекардарынан араас сылларга Люция Семеновна Капитонова, Августина Гаврильевна Семенова, Дария Афанасьевна Николаева, уонна Агафия Павловна Колтовская үлэлээбиттэрэ.
2022 сылга саҥа дьиэҕэ көһөн Ыччат библиотекатын аатын ылан үлэлээбитэ номнуо сылтан орто.
Санатан эттэххэ улуус дьаһалтата 2021 сылга саҥа дьиэ атыылаһан, дизайын-проегын оҥотторон, мебелинэн, компьютерынан хааччыйан, ыччака аналлаах библиотека ыам ыйын 25 күнүгэр эдэр ааҕааччыларга аанын тэлэччи аспыта.
Библиотека 8 тыһыынча кэриҥэ кинигэ фондалаах, тыһыынчаттан тахса ааҕааччылаах.
Манна икки анал үрдүк үөрэхтээх үлэһиттэр, кылаабынай бибилэтиэкэринэн Светлана Николаева, сүрүннүүр бибилэтиэкэринэн Мария Иванова үлэлии-хамсыы сылдьаллар.
Ол курдук Ыччат бибилэтиэкэтэ элбэх эдэр ыччаты ааҕыыга, билиигэ-көрүүгэ угуйар, патриотическай, эстетическай, экологическай, чөл олоҕу тутуһууга хайысхаларынан үлэлиир.
Сыл устата араас хабааннах тэрээһиннэр буолаллар: быйыл дойду үрдүнэн Уһуйааччы уонна Аҕа сүбэһит, Саха Өрөспүүбүлүкэтигэр Үлэ сыла бигэргэммитэ. Бу сыллар чэрчилэринэн уонна атын бэлиэ тэрээһиннэри билиһиннэрэр, кэпсиир кинигэ быыстапкалара, бэсиэдэлэр, өй оонньуулара, викториналар, ыччаттар араас таһымнаах тэрээһиннэрэ ыытыллаллар, ону таһынан акцияларга кыттар.
Библиотека иһинэн 3 проект үлэлиир. Ол курдук: Х.О.Т., ол эбэтэр Хоруйдаа, Оонньоо, Кыай диэн өркөн өйү, тобуллаҕас толкуйу тургутар өй оонньуута.
А. А. Х. – Айымньыны Ааҕарга Холбос. (Айымньыны Айарга Холон) оҕону ааҕарга, айымньыны өйтөн суруйууга угуйуу.
«Время выбора» үрдүкү кылаас оҕолорун эрдэттэн идэни сөпкө таларга сирдээһин. Оҕолору кытта бэсиэдэлэр, көрсүһүүлэр, библиотечнай уруоктар ыытылаллар.
Саҥа тупсаҕай аныгы кэм ирдэбилигэр эппиэттиир көрүҥнээх, бары өттүнэн хааччыллыылаах библиотекаҕа оҕо-аймах, ыалдьыт да сылдьара биллэ элбээтэ. Бэл диэтэр Москубаттан, Республика салайааччылара, улуустартан кэлэн сэргээн бараллар.
Биһиги ыалдьыттарбытынан буолбуттара Саха Республикатын Ил Дархана Айсен Сергеевич Николаев, Ил Түмэн депутаттара, Российскай Федерация Геройа, летчик-космонавт Олег Германович Артемьев, Тааттаттан, Сунтаартан, Ньурбаттан, Үөһээ Бүлүүттэн биир идэлээхтэрбит.
Киһи аймах үйэлэргэ айбыт, муспут муудараһа барыта кинигэҕэ баар. Кинигэ быһаччы киһи ис туругар, өйүгэр-санаатыгар, олоҕор дьайар кыахтаах. Кинигэни ааҕар киһи элбэҕи билэр, сайдар, дириҥник толкуйдуур, олоҕу ырыҥалаан көрөр буолар.
Онон төрөппүттэргэ туһаайан этиэхпитин баҕарабыт «Кинигэ баар, бараммат баай», оҕолоргутун, сиэннэргитин бибилэтиэкэҕэ кэлэн кинигэ ааҕалларын ситиһиҥ, бэйэҕит холобургутун көрдөрүҥ.
Светлана Николаева, кыл. бибилэтиэкэр,
Мария Иванова, сүрүннүүр. бибилэтиэкэр, Ыччат библиотеката, Бүлүү
