1995 сыллаахтан ыам ыйын 27 күнүгэр Бүтүн Россия үрдүнэн библиотека күнэ бэлиэтэнэр. Бу күн дойду бары библиотекаларыгар быйыл «Библионочь» 12-с төгүлүн ыытылынна. Акция Бүлүү куоратыгар ыам ыйын 26 күнүгэр, киин библиотека ааҕар саалатыгар, үлэһиттэр бэйэлэрэ сөбүлүүр дьарыктарын ааҕааччыга арыйар быыстапкаларынан саҕаланна. Библиотекарь идэлээхтэр иискэ-ууска, баайыыга, оҕуруону тиһиигэ, онтон да атын көрүҥнэргэ чочуйан оҥорбут үлэлэрин дьон бары сөҕө-махтайа сыныйан көрдө.
Сүрүн тэрээһиннэри ыччат библиотекатыгар ыытыллыбыт үөрүүлээх чаас арыйда. Манна кыттыыны Бүлүү оройуонун депутаттарын сэбиэтин председателэ Гаврил Корякин, улуус дьаһалтатын дьыалаларын салайааччы Клара Гаврильева, Бүлүү куоратын баһылыга Ян Попов, улуус культураҕа үлэһиттэрин профсоюһун председателэ Александра Иванова ыллылар. Библиотека үлэһиттэригэр эҕэрдэ тыл үтүөтэ этилиннэ, бастыҥ үлэлээхтэргэ хайҕал, махтал суруктара туттарылыннылар. Библиотека директора, куорат депутаттарын сэбиэтин председателэ Николай Харлампьев биир идэлээхтэрин эҕэрдэлээн туран, үлэни саҥа хайысхаларынан өссө тэтимнээхтик сайыннарарга, үрдүк ситиһиилэргэ дьулуһарга ыҥырда.
Салгыы киин библиотекаҕа литератураны сэҥээрээччилэр уус-уран ааҕыыларга кытыннылар. Уус-уран ааҕыы айымньы ис хоһоонун, суолтатын тиэрдэргэ улахан оруоллаах. Дэлэҕэ даҕаны, «Ханнык тыл этиллибитэ суолтата суох, ол тыл хайдах этиллибитэ суолталааҕа кырдьык» диэн этиэхтэрэ дуо?
Ааҕыы кыттыылаахтара Бүлүү куорат Н.С.Степанов аатынан 3 №-дээх оскуола 5 кылааһын үөрэнээччилэрин биир дойдулаахпыт, народнай поэт Михаил Тимофеев хоһоонун толорууларын сэргээн иһиттилэр (салайааччы М.К.Муксунова). Салгыы классик суруйааччыбыт Анемподист Иванович Софронов – Алампа «Куоратчыт» кэпсээниттэн сахалыы, биллиилээх суруйааччы Александр Иванович Куприн «Олеся» кэпсээниттэн нууччалыы быһа тардыылары уустаан-ураннаан аахтылар. Иккиэн да, дууһа кылын таарыйар айымньылар, бу күн хас биирдии ааҕааччыттан уратытык иһилиннилэр.
«Талаан норуокка баар» диэн мээнэҕэ эппэттэр. Библиотека ураты киэһэтин Москва, Санкт-Петербург, Казань куораттарга ыытыллыбыт норуоттар икки ардыларынааҕы күрэхтэр кыайыылаахтара Үөһээ-Бүлүүттэн сылдьар Анастасия Егоровна Борисова ситэри киэргэттэ. Талааннаах маастар киһи эрэ барыта ылсан дьарыктаммат түүнү хатайдааһын (валяние) ньыматын эрэллээхтик баһылаабытын кэлбит эрэ барыта кэрэхсээтэ. Сымнаҕас, намчы түүнү хатайдаан, киэптээн, өҥүн-дьүһүнүн таба аттаран оҥорбут дьоһуннаах үлэлэрин, хатыламмат таҥаһын-сабын быыстапкатын умсугуйан көрдө. Дойду улахан түһүлгэлэрин быыстапкаларыгар үрдүктүк сыаналаммыт сиэдэрэй, эриэккэс сылаас таҥастарын көрөөччүлэр ойон туран бэйэлэрэ кэтэн хаамсыбыттара көрсүһүү ураты долгутуулаах, истиҥ эйгэтин үөскэттэ. Кыттыбыттарга умнуллубат өйдөбүлү хаалларда.
Библиотека дьиэлэригэр «Айар» кинигэ кыһатын атыыта, өбүгэ остуолун оонньуулара, интеллектуальнай күрэхтэр ыытылыннылар. Талба талааннаахтар араас маастар кылаастарга дьарыктанан саҥаны, сонуну биллилэр. Улууспутугар доруобуйа сылыгар анаан киин балыыһа үлэһиттэрэ тэрийбит «Доруобуйа дьаарбаҥката» бэрт сонуннук, туһалаахтык ааста. Онтон, оҕуруотунан дьарыктанар хаһаайкалар сибэкки, оҕуруот аһын рассадатын атыытын кэрэхсээтилэр.
Ити курдук, библиотека ыалдьыттара бэйэлэрэ сөбүлүүр, сэргиир дьарыктарын булан, кэрэҕэ кыттыһан, бу киэһэни көхтөөхтүк атаардылар. Алыптаах баян тыаһынан ырыа-үҥкүү тардыллан, киэһээҥи Бүлүү ыам ыйын сылаас, сырдык тыыныгар куустарда.
Саха дьонугар кэтэһиилээх ыам ыйын народнай суруйааччыбыт Наталья Михалева-Сайа хоһуйбут тыллара бу күнү толору арыйар курдуктар:
«Ыам ыйыгар өрүс эстэр,
Ыам ыйыгар кэҕэ этэр –
Ыам ыйыгар бары кэрэ
Сир үрдүгэр биирдэ кэлэр.»
Киин библиотека кыраайы үөрэтиигэ кылаабынай бибилэтиэкэрэ
Луиза Кононова
