Новости

Навигация: Библиотеки-филиалы — Чернышевская модельная библиотека филиал №18 — Новости


Саха суруналыыстыкатын Далбар Хотуна –IMG_9905~1

Нина Иннокентьевна Протопопова 90 сааһа

          Олунньу 22 кунугэр Чернышевскайдааҕы «Кыталык» сынньалаҥ киинигэр саха суруналыыстыкатын Далбар Хотуна, өссө тыыннааҕар номох буолбут Ытык киһибит, Булуу улууһун Уоттутуттан төруттээх Нина Иннокентьевна Протопопова 90 сааһыгар аналлаах истиҥ, иһирэх ахтыы киэһэтэ ыытылынна, тэрээһини иилээн-саҕалаан, салайан ыытта — Чернышевскайдааҕы бибилэтиэкэ кылаабынай бибилэтиэкэрэ Л. П. Корякина

          Киэһэбит үөруулээх чааһын «Республика Бочуоттаах олохтоохторо» диэн серияҕа республикатааҕы «Бичик» кинигэ кыһатыгар бэчээттэнэн тахсыбыт «Нина Иннокентьевна Протопопова» диэн уонна 2005 сыллаахха тахсыбыт Г.Ф.Корякин, Н.И.Протопопова хомуйан таһаартарбыт «Уотту – төрут сирбит» диэн кинигэлэргэ киирбит ахтыылартан уонна Нина Иннокентьевна бэйэтин суруйууларыттан таҥыллыбыт эдэр ыччат уус-уран толоруутунан арыйдыбыт.

          Үөруулээх киэһэҕэ кыттыыны ыллылар:

  1. Корякин Гаврил Семенович – депутаттар оройуоннааҕы Советтарын председателэ
  2. Протопопов Артур Владимирович – «Чернышевскай нэһилиэгэ» МТ дьаһалтатын баһылыга
  3. Ионова Альбина Ионовна – «Дьөккөн нэһилиэгэ» МТ дьаьалтатын баһылыга
  4. Веревкин Иван Прокопьевич – «Бэлэм буол» хаьыакка корреспонденынан үлэлээбит, Россия журналистарын Союһун чилиэнэ
  5. Веревкина Мария Прокопьевна – педагогическай улэ ветерана, иитиллибитинэн Н.И.Протопопова балта
  6. Константин Кириллович Корякин – педагогическай улэ ветерана, Уоттуттан теруттээх Нина Иннокентьевна биир дойдулааҕа
  7. Ия Николаевна Протопопованы – Нина Иннокентьевна чугас дьүөгэтэ, «Айыы Далбар Хотуна» кинигэ 5 чааһыгар киллэриллибит Мякишева Александра Федотовна кыыьа.

Нина Иннокентьевна дойдутун туһунан маннык суруйбута: «Санаабытыгар, биһиги төрүт сирбитигэр холоонноох үчүгэй сир-уот суох, биһиги дьоммут курдук улэһит, көрсүө-сэмэй, үөрэ-көтө сылдьар, кэрэ дьүһүннээх дьонноох-сэргэлээх сир аҕыйах курдук».

Кини ахтар-саныыр Уоттутун туһунан биһиги биир дойдулаахпыт Николай Николаев хоһоонугар ырыа айыллан, Уоттуга клип уһуллубута. Ол ырыаны «Сандаара» вокальнай ансаамбыл толоруутугар иһиттибит.

«Кыталык» СК уонна Чернышевскайдааҕы бибилэтиэкэ көҕулээһининэн оскуола оҕолоругар «Төрөөбүт төрүт дойдум» диэн өйтөн суруйуу күрэҕэ ыытыллыбыта. Күрэххэ киирбит суруйуулары «Кэскил» хаһыат редакцията сыаналаан, бу киэһэҕэ түмүгүн таьаардыбыт. Бастыҥ үлэлэр «Кэскил» хаһыакка бэчээттэниэхтэрэ.

Ахтыы- киэһэтэ нэһилиэк олохтоохторун кэнсиэринэн тумуктэннэ.

Ытык киһибит — Нина Иннокентьевна үтүө аата, олорбут сырдык, чаҕылхай,  дьоһуннаах олоҕо бар дьонугар холобур буолан, сырдыкка-кэрэҕэ угуйа туруохтун!

Матырыйаалы бэлэмнээтэ: Л. П. Корякина, Чернышевскайдааҕы модельнай бибилэтиэкэ кыл. бибилэтиэкэрэ

EnglishРусский
Обратная связь