Олоҥхоһут Каратаев Василий Осипович – Харатай Баһылай

Бороҕон нэһилиэгиттэн төрүттээх, Бүлүү улууһун биир биллэр-көстөр ааттаах-суоллаах олоҥхоһута Каратаев Василий Осипович  – Харатай Баһылай тохсунньу 14 күнүгэр төрөөбүтэ 95 сылын бэлиэтиибит. Кини «Тулаайах оҕо», «Эрэйдээх-буруйдаах Эр соҕотох», «Эрбэхтэй Бэргэн» олоҥхолору айбыт сүдү талааннаах олоҥхоһутунан биллэр. Салгыы Бүлүү улууһун, Бороҕон библиотеката бэлэмнээбит матырыйаалларын билсиҥ.


Каратаев Василий Осипович – Бороҕон нэһилиэгин Дириҥ диэн алааһыгар 1926 с. сүөһү ииттэн, булдунан дьарыктанан олорбут дьадаҥы бааһынай ыалыгар төрөөбүтэ. Кини аатырбыт ырыаһыт, олоҥхоһут Дыгыйар Сэмэн сиэнэ.

Аҕа дойду сэриитин сылларыгар колхоз төһүү үлэһитэ этэ, от охсуутугар иннин кимиэхэ да биэрбэтэ, 1945 с. от үлэтэ саҕаланыаҕыттан 18 га сири охсон «Колхоз суола» хаһыакка хайҕаммыта. Василий Осипович байанайдаах булчут, дэгиттэр сатабыллаах мындыр мас ууһунан биллэрэ.

Биир алааска үөскээбит, оройуон биллэр ууһа Мальцев Кирилл Кириллович бырыйыагынан колхоз 1951 с. 150 миэстэлээх кулуубу биир сыл иһинэн тутан үлэҕэ киллэрбитэ. Оччотооҕу кэмҥэ ол Орто Бүлүүгэ суох улахан кулууп этэ. Маһын кэрдиитигэр, таһыытыгар, тутуутугар Василий Осипович тилэри сылдьыспыта. Кулууп үлэтэ киириитин сүргэлэрэ көтөҕүллэн бэлиэтээбиттэрэ. Ити киэһэ Василий Осипович үрдүк сыанаттан бар дьонун иннигэр «Дьулуруйар Ньургун Боотур» олоҥхоттон Айыы бухатыырын ырыатын толорбута.

50-с сылларга холкуоһугар булчутунан сылдьан, Үөһээ Бүлүү Туобуйатыгар үс кыһыны быһа Саҥыйах Сэмэн олоҥхолуурун истибитэ, киниттэн олоҥхо эгэлгэ матыыбыгар үөрэнэн, «Оҕо Тулаайах» олоҥхону ылыммыта.

Кини хас олоҥхолоотоҕун ахсын урукку үгэһи олохтоохтук тутуһан, олоҥхотун тылынан этиитин кэҥэтэн, ырыатын тыынын уһатан иһэр идэлээҕэ. Василий Осипович төрөөбүт норуотун фольклорнай айымньытын үйэтитиигэ улахан сыратын биэрбитэ. Бэйэтин толорор үрдүк маастарыстыбатын Москва, Новосибирискай, Алма-Ата, Клайпеда курдук бөдөҥ куораттар ирдэбиллээх истээччилэрин иннигэр көрдөртөөбүтэ.

Василий Осипович Бороҕон оскуолатын кыраайы үөрэтээччилэригэр Үөлэс күөллэринэн, Аччыгый Муҥхаарыма үрэх түөлбэлэринэн сирдьит быһыытынан сылдьыспыта. Кини чаҕылҕан курдук күлүмнээн ааспыт олоҕор биир киһиэхэ тиксэр дьолго барытыгар тиксибитэ. Василий Осипович Каратаев ыал буолан, алаһа дьиэ тэринэн, таптыыр кэргэнинээн Ульяна Михайловналыын 12 оҕону күн сиригэр көрдөрөн, элбэх сиэннэнэн дьоллоох олоҕу олорон, 1990 с. күн сириттэн күрэммитэ.



Матырыйааллары хомуйан бэлэмнээтэ: Каратаева С. П.,
Бороҕон нэһилиэгин модельнай библиотекатын кыл.. бибилэтиэкэрэ


Навигация: Вернуться на главную страницу

Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь