Киин бибилэтиэкэ Бүлүү үбүлүөйдээх «Өрөгөй Ыһыаҕар»

Түөрт саха төрүөҕүн түһүлгэлээх ыһыаҕын, киэргэллээх кэрэ аатын өһүккэ – омукка тиэрдэн
Тоҕус үйэ тухары тарҕата турдун! Уруй! Уруй! Уруй!

Урааҥхай сахаларга былыр былыргыттан умнуллубакка бу күҥҥэ диэри кэлбит Үрүҥ айыылар алгыстарын, арчыларын иҥэринэн, айылҕалыын алтыһар үтүө үгэспит – ыһыах буолар. Бу эрэ күн сахалыы саҥа, ырыа – тойук, көр – нар, сахалыы ас – таҥас, күрэх – түһүлгэ, оһуохай – олоҥхо, сиэр – туом силигэ ситэ сириэдийэр, омук тыына ырылыччы көстөр сүдү суолталаах, саха ааттаах киэнимсийэр киэн туттуута, дьоһумсуйар дьоһууна, үрдүүр өрөгөйө үүнэр.

Үгэһинэн Бүлүү кииннэммит библиотека үлэһиттэрэ, Ытык кырдьаҕас Бүлүү куораппыт үбүлүөйдээх ыһыаҕын ыҥырыытын ылынан, ытыгылаан кэлбит, ыраахтан – чугастан мустубут ытык – мааны ыалдьыттарбытын, улууспут бас – көс дьонун, олохтоохторун түптэ унаар буруотун сытыгар ыраастааныы сиэрин тутуһан, ситиигэ салама баайтаран көрүстүбүт.

Чороон иһит чуоҕуспут, кэриэн иһит кэккэлээбит, кытыйа иһит кыттыспыт, ымыйа иһит ыалласпыт Илгэ – быйаҥ түстүүр үҥкүүгэ оһуор  — дьарҕаа түһэрэн кыттыгастаан ыллыбыт. Бар дьону түмэр оһуокай үҥкүүтүн оройуттан туттубут, күргүөм тойук алыбар ыллардыбыт. Алгыс тылын иҥэринэн инникибитигэр күүс – уох ыллыбыт, санаабытын бөҕөргөттүбүт.

Софронова В. В., Оройуоннааҕы оҕо бибилэтиэкэтин кыл. бибилэтиэкэрэ



Навигация: Вернуться на главную страницу

Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь