Тохсунньу 18 күнүгэр, Саха народнай поэта Иван Михайлович Гоголев-Кындыл төрөөбүтэ 90 сылыгар аналлаах үбүлүөйдээх АҺАҔАС УРУОГУ Советскай Союз Геройа Н. С. Степанов аатынан Бүлүүтээҕи 3№ оскуола тэрийэн ыытта. Бу күн оскуолаҕа алтан чуораан чугдаарда, поэт хоһоонноро ааҕылыннылар, олоҕун, айар үлэтин кэпсиир быыстапка тэрилиннэ.
Саха народнай поэта Уйбаан Гоголев-Кындыл 90 сааһын бэлиэтээн улууска киэҥ далааһыннаах тэрээһиннэр буоллулар.
2017 сылтан саҕалаан сылын ахсын Бүлүү куорат оскуоланы бүтэрээччилэригэр анаан И. Гоголев олоҕор, айар үлэтигэр аналлаах аһаҕас уруок ыытыллар. Бу тэрээһини саҕалааччыларынан уонна төрүттээччилэринэн Бүлүүтээҕи киин библиотека буолар.
Быйыл үбүлүөйдээх аһаҕас уруогу Советскай Союз Геройа Н. С. Степанов аатынан Бүлүүтээҕи 3 № оскуола тэрийэн ыытта. Уруогу иилээн-саҕалаан саха тылын учууталлара Мария Касьяновна Муксунова уонна Акулина Николаевна Петрова ыыттылар.
Уруок И.Гоголев-Кындыл 1995 сыллаахха дойдутугар Бүлүүгэ кэлэ сылдьан аахпыт «Кырасыабай буола үөрэн» хоһоонуттан саҕаланна.
Уруок олус сэргэхтик, кэлбит бары оҕолору хабан көхтөөхтүк ааста. Бүлүүтээҕи 3-с оскуола үөрэнээччилэрэ айымньыттан быһа тардан хоһоон ааҕан, кылгас инсценировка туруоран көрдөрдүлэр. БПК студенката Мария Михайлова “ Хара кыталык” романтан монолог аахпытын сэргээтилэр.
Оскуолалар хамаанданнан арахсан анабыл хоһоон айыытыгар, тыл оонньуутугар, викторина таайыытыгар күрэхтэстилэр. Түмүккэ бары анал номинациялары, наҕараадалары туттулар.
Эһиилги аһаҕас уруогу Социалистическай Үлэ Геройа П. И. Быканов аатынан Халбаакы орто оскуолата ыытар буолла. “Аһаҕас уруок” эстафета анал бэлиэтин оскуола директора Г.В. Иннокентьев уонна саха тылын, литературатын учуутала С.Н. Петрова туттулар.
Мария Иванова, Улуус киин бибилэтиэкэтин сүрүннүүр бибилэтиэкэрээ
Навигация: Вернуться на главную страницу