Лэппириэн Уус удьуора

Атырдьах ыйын 30 күнүгэр, В.О. Каратаев аатынан Олонхо дьиэтигэр, Аҕа дойду сэриитин уонна үлэ ветерана, Бүлүү  к. бочуоттаах олохтооҕо, механизатор, рационализатор, общественник Афанасий Семенович Герасимов туһунан «Лэппириэн Уус удьуора, үтүө киһи, улуу механизатор Афанасий Герасимов»  ахтыы кинигэни ааҕааччы киэҥ араҥатыгар билиһиннэрии буолан ааста.

Кинигэ Бүлүү куорат төрүттэммитэ 385 сылыгар, Улуу Кыайыы өрөгөйдөөх 75 сылын көрсө, «Офсет» кинигэ кыһатыгар, 100 ахсаанынан  бу күннэргэ бэчээттэнэн таҕыста.

Кинигэҕэ Афанасий Семенович бэйэтин олоҕун туһунан ахтыытыттан кыыһын суруйуута,  кини туһунан оҕолорун, сиэннэрин, аймах-билэ дьоннорун, доҕотторун уонна бииргэ үлэлээбит, алтыспыт дьонун-сэргэтин ахтыылара, Лэппириэн аҕатын ууһун төрүччүтэ хомуллан киллэриллибиттэр. Кинигэ алта түһүмэхтэн турар, элбэх хаартыскалардаах.

Кинигэ түмүк тылын суруйда Афанасий Семенович Герасимов кыыһа — Мария Афанасьевна Тимофеева — педагогическай үлэ бэтэрээнэ, СР үөрэҕириитин үтүөлээх үлэһитэ, РФ үөрэҕириитин туйгуна, Бүлүү куоратын бочуоттаах олохтооҕо, «Үрүччэ» ырыа-үҥкүү образцовай ансаабылын төрүттээччи. Хомуйан оҥордулар Мария Афанасьевна Тимофеева, Регина Васильевна Тимофеева, Аида Константиновна Андреева.

Тэрээһиҥҥэ Бүлүү улууһун (оройуонун) МТ дьаһалтатыттан социальнай боппуруоска отдел начальнига А. А. Кудайбердиева, Улуустааҕы бэтэрээннэр сэбиэттэрин бэрэссэдээтэлигэр Г. А. Солтуев, СӨ норуотун хаһаайыстыбатын үтүөлээх үлэһитэ, потребооперациятын туйгуна И. А. Волков, “Сыа Бүлүү» ПКООП директоры солбуйааччыта, Оройуон Сэбиэтин депутата В. А. Григорьев, Д. С. Седалищев, Е. Д. Петрова, СӨ үтүөлээх экэнэмииһэ А. К. Андреева, Сэрии оҕолорун улуустааҕы түмсүү бэрэссэдээтэлэ, Улуустааҕы депутааттар сэбиэттэрин депутаата Н. В. Матвеев, П. С. Спиридонов кэлэн ыалдьыттаатылар, истиҥ, сылаас тылларынан ахтаан-санаан аастылар.

Кинигэ сүрэхтэниитин иилээн-саҕалаан ыытта Бүлүүтээҕи киин библиотека.

Мария Иванова, КОО кыл. бибилэтиэкэрэ



Навигация: Вернуться на главную страницу     

Оставить комментарий

EnglishРусский
Обратная связь