Сахалыы диктант — 2019 : түмүк

Олунньу 13 күнүгэр Бүлүү улууһун нэһилиэктэригэр, куорат 23 № библиотека – филиалыгар, киин библиотекаҕа  — республика үрдүнэн ыытыллар акцияҕа кыттыһан, 150-ча киһи,  САХАЛЫЫ ДЬЫКТААН суруйдулар, төрөөбүт ийэ тылларын төһө билэллэрин тургутан кордүлэр.

Бу күн Бүлүүтээҕи киин библиотека ааҕар саалатыгар мустан куорат олохтоохторо сахалыы дьыктаан суруйдулар. Манна барыта  19 киһи кытынна. Дьыктаан 255 тылтан турар,  П.А.Ойуунускай “Сүүс сыллаах улуу былаан (Оҥоһуллан эрэр олоҥхо)” кэпсээниттэн быһа тардыы. Аахта Саха Республикатын үөрэҕириитин туйгуна Бүлүү куоратын Н. С. Степанов аатынан 3 № оскуола саха тылын уонна литературатын учуутала Муксунова Мария Касьяновна.



Сахалыы дьыктаан түмүгэ.

«4» сыананы ыллылар – 10 кыттааччы,
«3» сыананы ыллылар – 9 кыттааччы.


 Сахалыы дьыктаан — 2019 (скачать файл Word)

Сүүс сыллаах улуу былаан

Улууһун аатын этиллибэт, олорор сирдэрин ыйыллыбат.

Саха үгүс үйэҕэ өбүгэтиттэн өбүгэтигэр диэри, эһэтиттэн-эбэтиттэн аҕатыгар-ийэтигэр диэри аллаах атынан айаннатан-айаннатан устатын-туоратын булбатах, кытыытын-кыраайын көрбөтөх төрөөбүт ийэ буор сиригэр, үөскээбит аан-ийэ дойдутугар, эргэнэ хара тыа эҥэрдээх, очуос тумуллардаах, түөлбэ күөл кииннээх, сыҥаһа кырдал систээх, уулаах үрэх киспэлээх, ааттаах алаас араҕас далбарыгар — ханнык эрэ улуу улуус Ситэриилээх комитета сириэдийэн олорбут эбит.

Сэтинньи ый кыыдаан дьыбара, оргуйа олорор улуу күдэнэ кэриэспин кэллим диэххэ айылаах, ордук күүһүрэн, таҥнары дьабыдыйан, ыйдаҥаны көрдөрбөт ыыспа туман буолан өрө оргуйбут эбит.

Арай Ситэриилээх комитет дьиэтин иһигэр лаампа уота умайан күндээрбит. Аарт-татай оҕолор! Бу түүн үөһүн саҕана туох ыксал-тиэтэл буолан дуу, туох түрбүөн-түрүлүөн буолан дуу лаампаны уматтылар, бастыҥ остуолга кыһыл сукуна ыскаатары тэлгэттилэр? Кыһыл сукуна сабыллыахха сабыллыбыт, лаампа убайыахха убайбыт, коммунист партия көмүс сымыыта, улуустааҕы чөмчөкөтө, олохтооҕу хараҕа — большевик партия ячейката уонна кини иккис сүһүөҕэ, эргийэр иэччэҕэ, эдэр ыччата — комсомол союһун аллараа салаата, улуустааҕы ячейката, Ситэриилээх комитет үлэһиттэрин, улуус учууталларын кытта мунньахтаары олороллор эбит. Көмөлтө дьоно кэлэн көстүбүттэр, эмчит дьоннор кэлэн эҥэрдэспиттэр, кооператив дьоно кэлэн кэккэлэспиттэр.

Большевик партия секретара, Өргөстөөх Өлөксөй, мунньаҕы аспыт. Атыыр мунньах буолбут, улуу сүбэ тахсыбыт, мунньустубут дьон бука барылара эппит тылбыт барыта сыанаҕа туруоҕа, саҥарбыт саҥабыт сүгэнэн суоруллубат улуу бэлиэҕэ киириэҕэ диэннэр, өйдөрүн-төйдөрүн булунан олорбуттар. Бу улуу сүбэҕэ ким даҕаны сыыһа тылы этэн сүүс сыл усталаах-туоратыгар хара мэҥнэниэҕин, сууйуллубат-сотуллубат хара кирдэниэҕин төрүт баҕарбат эбит. Ама кырдьыга даҕаны оонньуу буолуо дуо саха норуотун олоҕун сүүс сыллаах улуу былаанын былаанныыр?! Оонньуу буолбатах…

П. А. Ойуунускай
«Сүүс сыллаах улуу былаан (Оҥоһуллан эрэр олоҥхо)»
кэпсээниттэн

 



Навигация: Вернуться на главную страницу

Оставить комментарий

Обратная связь