Биһиги ыалдьыппыт – Степан Петров – Ырыа Ыстапаан

Ахсынньы 13 күнүгэр, Бүлүүтээҕи киин библиотека тэрийиитинэн, Олонхо дьиэтигэр, Бүлүү к. олохтоохторугар ураты сэргэх, сонун, умнуллубат көрсүһүү буолан ааста.

Омук ааттаахтарын сөхтөрбүт, элбэх бэстибээллэр сүрүн бириистэрин ылан соһуппут, саха дьонун-сэргэтин үөрдүбүт, саха омугун ааттаппыт — Василий Яковлев «Кытта кырдьыбыт тэҥкэ тиит» кэпсээнигэр олоҕуран,  Семен Ермолаев сценарийынан, режиссер Эдуард Новиков туруоруутунан уһуллубут «Тойон кыыл» киинэ — Саха култууратын, эдэр кинематографиятын эрэ буолбакка, бүтүн норуот ситиһиитин чыпчаалынан, өрөгөйүнэн буолла!

«Тойон кыыл» киинэҕэ сүрүн, Собо уола Микииппэр оруолун толорбут, СӨ культуратын туйгуна, СӨ үтүөлээх артыыһа Степан Петров – Ырыа Ыстапаан биир дойдулаахтарын кытта көрүстэ. Дойдутун дьоно үөрэ-көтө, уруйдуу, дохсун ытыс тыаһын көрүстүлэр.

СӨ культуратын үтүөлээх үлэһитин Владимир Васильев хора «Ол түүн», «Оҕо сааһым доҕотторо», «Эн комсомол – мин дьолун» ырыаннан эҕэрдэлээн көрсүһүүнү арыйдылар. Хор салайааччыта Владимир Васильев, эдэр сааһын эрэллээх доҕоругар эҕэрдэ тылларын эттэ, бииргэ алтыспыт кэмнэрин аҕынна.

Степан Дмитриевичка эҕэрдэ тылы эттилэр Бүлүү улууһа (оройуона) МТ дьаһалтатын баһылыгы социальнай боппуруоска солбуйааччыта Л.Я. Кононова, Бүлүү улууһа (оройуона) МТ култуураҕа уонна дьиэ кэргэн политикатыгар управление аатыттан Т.П. Степанова.

Степан Петровы кытта көрсүһүү  кэпсэтии сиэринэн истиҥ-иһирэх быһыыга ааста.  Көрсүһүүгэ кэлбит дьон киинэ артыыһын үлэтин, хайдах уһуллубутун, бииргэ уһуллубут дьонун  туһунан кэпсииригэр көрдөстүлэр:

Мин кинилэртэн сабырыйтарар киһибин, кинилэр бу Саха театрын ведущай, СӨ үтүөлээх артыыстара. Олоруҥ, аптарытыаппыт баттыа диэн куттаналлар буоллаҕа дии, ону ол — куттаныма, биһигини кытта бэйэҥ тэҥнээхтэриҥ курдук сырыт ээ, — дииллэр. Ол иһин, кинилэр тыллара тиийэн, эрэллээхтик оонньоон, ити суруйалларын курдук “хараҕым уоттаммыта ”  буолуо, — диэн кэпсиир Степан Петров.

Дьон-сэргэ кини кэпсэлин, Ырыа Ыстапаан ырыаларын эт кулгаахтарынан истэн астынан, дуоһуйан тарҕастылар.
Степан Дмитриевичка, айар-тутар талааннаах биир дойдулаахпытыгар үрдүктэн үрдүк ситиһиилэри, өссө да үтүө сурахтар үөрдэ туралларыгар, этэҥҥэ буоларыгар баҕарабыт!

Мария Егорова,
Бүлүүтээҕи киинэммит библиотечнай ситим дириэктэрин солбуйааччыта


Петров Степан Дмитриевич туһунан  ыстатыйаны Электроннай библиотекабытыгар ааҕыҥ, сэргээҥ

Григорьев, Святослав Павлович. Ситиһиитин дойдутугар анаата  / Святослав Григорьев // Олох суола. — 2018. — Ыам ыйын 25 күнэ. — С. 4.



Навигация: Вернуться на главную страницу

Оставить комментарий