«Анастасия Кирилловна Павлова» : саҥа кинигэ сүрэхтэниитэ

Сэтинньи ый 30 күнүгэр Бүлүү куоратын киин библиотекатыгар, Бүлүүлэр киэн тутта ааттыыр дьоһун киһибит — Анастасия Кирилловна Павлова олоҕун, үлэтин сырдатар кинигэ сүрэхтэниитэ буолан ааста. Кинигэ «Замечательные люди Якутии» серияҕа, 200  ахсаанынан таҕыста.

Анастасия Кирилловна Саха Республикатын норуотун хаһаайыстыбатын үтүөлээх үлэһитэ, Бүлүү улууһун, Бүлүү куоратын бочуоттаах олохтооҕо, Саха Республикатын 1 кылаастаах  дьиҥнээх государственнай советнига. Бүлүү улууһун 1994 – 2000 сылларга салайбыт,  уустук кэмнэргэ  инники сыалын-соругун түстэспит, мындыр толкуйунан саҥалыы дьаһанан, олох суолугар эрэллээхтик үктэннэрбит сатабыллаах салайааччы буолар.

Тэрээһиҥҥэ улууспут баһылыга С.Н.Винокуров, Бүлүү куоратын баһылыга Нь.В.Афанасьев, Культураҕа, ыччакка уонна дьиэ кэргэн политикатын начальнигын солбуйааччы Н.Н.Иванова, «Алгыс» сынньалан киинин салайааччыта С. М. Саввинова, ыччат отделыттан салайааччы Т.Е. Федорова, П.Х.Староватов түмэлин краеведа Н.С.Миронов, Госсулууспа бэтэрээнэ, Бүлүү куорат бочуоттаах олохтооҕо К. Е. Саввинова, СР норуотун хаһаайыстыбатын үтүөлээх үлэһитэ, СР Муниципальнай сулууспа туйгуна А. И. Ионова,   уонна бииргэ үлэлээбит, алтыспыт дьонноро, үөлээннээхтэрэ кэлэн оччотооҕу сыллар күүрээннээх үлэлэрин ахтыстылар.

Хас биирдии тыл эппит киһи Анастасия Павловна кини олоҕор туох эрэ суолталааҕы  хаалларбытын, сөптөөх соругу ыйбытын бэлиэтээтэ.

Биир дойдулаах норуодунай поэппытын И.Гоголев-Кындылы үйэтитэргэ анаан «Гоголев ааҕыыларын» сылын ахсын ыытарга, киин библиотека өттүттэн этии киирбитигэр, Анастасия Кирилловна дьиҥ суолтатын өйдөөбүтэ, өйөөбүтэ. Поэт төрөөбүтэ 65 сааһын үрдүк таһымҥа ыыппыппыт. И.Гоголев олус сүргэтэ көтөҕүллэн «Ис сүрэххититтэн ылсыбыт эбиккит» диэн олуһун махтанан, астынан барбыта.

Ол түмүгэр «Гоголев ааҕыылара» тэрээһин тиһигин быспакка ыытылла тураллар.

Үөрүүлээх түгэнинэн буолар, Анастасия Кирилловна, бу тахсыбыт кинигэттэн — 50-нун библиотекаҕа бэлэх ууммута, хас биирдии нэһилиэк библиотекатыгар тиксэрин курдук. Улуус дьоно – сэргэтэ дьоһун дьон олохторун, улуус историятын билэлллэригэр көмө буолуо, ааҕааччы киэҥ араҥатын хабыа диэн эрэнэбит.         

Көрсүһүү итии-истиҥ, иһирэх эйгэҕэ ааста.   Анастасия Кирилловна кэлбит дьоҥҥо махтанна уонна Бүлүүгэ үлэлээбит сылларын өрүү ахтарын, саныырын эттэ. Инникитин Бүлүүбүт улууһа сайда турарыгар баҕа санаатын эттэ.

Дьон бу көрсүһүүттэн астынан-дуоһуйан, сэргэхсийэн, Анастасия Кирилловнаҕа махтанан тарҕастылар.

(Кинигэ ойуутун баттааҥҥыт, кинигэ кылгас ис хоһоонун кытта билсиэххитин сөп
Наведя курсором на изображение книги, можете ознакомиться с кратким содержанием книги )

Мария Иванова, КОО кыл. бибилэтиэкэрэ


 Хаартыскаҕа түһэрдэ: Л.С. Капитонова, библиограф


Навигация: Вернуться на главную страницу

Оставить комментарий