Кинигэ — олоҕун аргыһа

98 саастаах Евдокия Семеновна Филиппова, Бүлүү куоратын олохтооҕо, тыыл, үлэ ветерана. Кини биир саамай сөбүлүүр дьарыга – кинигэни ааҕыы, аахтаран истии…Олоҕун устата кинигэни доҕор оҥостубут ытык-мааны кырдьаҕас ааҕааччыбыт сырдыкка, билиигэ тардыһыыта, олоххо дьулуура эдэр көлүөнэ ыччакка үтүө холобур буолар.
Мин ийэм Филиппова Евдокия Семеновна 1920 сллаахха 1 Күүлэт нэһилиэгэр төрөөбүтэ. Ийэтэ 2 сааһыгар өлөн, аҥардас аҕаҕа иитиллэн үөрэммэккэ хаалбыта.

Сэрии ыар сыллара, колхоз ыарахан үлэтэ, кэргэнэ эрдэ өлөн биэс кыыһын барытын бэйэтэ иитэн үрдүк үөрэхтээбитэ.
Кинигэни уруккуттан аахтаран истэрин наһаа сөбүлүүрэ. Билигин олох сайдан, бэйэтэ библиотека ааҕааччыта буолла. Хараҕынан 1 группалаах инбэлиит буолан тифлоплеер диэн флешканнан саҥарар кинигэлээх. Онон араас сахалыы кэпсээннэри истэр. Амма Аччыгыйа “Сааскы кэм“ , Болот Боотур “Сааскы дьыбардар”, Иван Гоголев – Кындыл “Хара кыталык”, Николай Якутскай “Көмүстээх үрүйэ”, “Алмаас уонна таптал”, Софрон Данилов “Киһи биирдэ олорор” уонна да атын кинигэлэри күнү быһа истэр.

98-таах, күнү быһа ороҥҥо сытар киһиэхэ бу кинигэтэ эрэ олоҕун киэргэтэр, уһатар. Кинигэтэ тохтоон хааллаҕына тэһийбэт, күнэ аһара уһун буолан хаалар. Онон көрбөттөр библиотекаларын үлэһиттэригэр, уларсан ааҕар Бүлүү библиотекатын үлэһиттэригэр барҕа махталын тириэрдэр уонна бырааһынньыккытынан эҕэрдэлиир.

кыыһа, Филиппова Н. С. 


Навигация: Вернуться на главную страницу

Оставить комментарий