«Ийэ тыл уонна сахалыы сурук-бичик» күнүгэр аналлаах тэрээһиннэртэн биирдэстэринэн нэһилиэнньэҕэ сахалыы диктант суруттарыыта буолар. Бу акция республика үрдүнэн сылын ахсын ыытыллар.Бу тэрээһинтэн Бүлүүлэр эмиэ туора турбакка, Олунньу 13 күнүгэр киэһэ 5 чаастан киин библиотекаҕа уонна куорат 23 № библиотека – филиалыгар сахалыы дьыктаан суруйдулар. Манна барыта 41 киһи кытынна. Дьыктаан 250 тыллаах -П.А.Ойуунускай «Дойду оҕото Дорогуунап Ньукулай» айымньытыттан быһа тардыы. Аахта Саха Республикатын үөрэҕириитин туйгуна Бүлүүтээҕи Г.С.Донской аатынан 2№ оскуола саха тылын уонна литературатын учуутала Докторова Ирина Петровна.
Улуус нэһилиэктэригэр бу күн эмиэ элбэх тэрээһин ыытылынна, дьыктаан суруйан төрөөбүт тылларын төһө билэллэрин тургутан кордүлэр.
Онон ийэ тыл уонна сахалыы сурук-бичик күнүгэр улуус олохтоохторо көхтөөх кыттыыны ыллылар.
Сахалыы диктант түмүгэ.
«5» сыана ыллылар:
- Дмитриева Ньургуяна Алексеевна;
- Николаева Людмила Ивановна;
- Протопопова Евдокия Александровна;
- Софронова Владилена Владимировна
«4» сыананы ыллылар – 15 кыттааччы,
«3» сыананы ыллылар – 5 кыттааччы.
«Сахалыы диктант — 2018″ (скачать файл Word)
П. А. Ойуунускай «Дойду оҕото Дорогуунап Ньукулай» кэпсээниттэн
Ымыы кэлэн ыллаабыт, туйаарар тэлибирии тэлээрэн киэҥ халлаан өрөһөтүн киэптии туойан дьырылаппыт. Онтон от-мас сыттаммыт, тыаҕа кэҕэ эппит, куолаһа куҥкунаабыт, кус-хаас саҥата элбээбит. Сырдык ньурал түүннэр буолбуттар, чыычаах ырыата элбээбит, сүрэх тэбиитэ күүһүрбүт, эт-хаан убайыыта улааппыт, айыыһыт ахтылҕана, иэйиэхсит илбиһэ — таптаһыы дьалына — «Мин күнүм кэллэ! Тыынар тыыннаах, хамныыр харамай, үөр-көт! Ыллаа-туой! Уурас-сыллас! Куустус-таптас!» диэн, икки атахтаах этигэр-хааныгар сүлүһүн буолан сүүрэн, эттэри эймэнитэ этитэн, тымырдары лыҥкыната ыллатан, уҥуохтары доргутан, туотан барбыт.
Бу көстөр күндү айылҕа иһигэр тыынар-тыыннаах, хамныыр харамай үрдүк баһылыга буолан үөскээбит икки атахтаах таптала туругурдун!
Айылҕа тиллиитэ, күн уотун сарыала сири таптаан уоттааҕынан ууруур, сылааһынан сыллыыр буолбаат! Сааскы күн тахсыыта көтөр кынаттаах күндү ырыаһыттара тапталы уруйдаан, сүрэхтэрин туотар буолбаттаар! Таптал барахсан туругурдун! Таптала суох олох — олох аатырыа дуо?!!
Оо, таптал! Таптал барахсан, туругур!
Эйигинэ суох бу ахтар айылгы, кута-сүрэ тохтон, кэхтиэ, киһитэ-сүөһүтэ быстан, дьоллоох уйата иччитэхсийиэ. Эйигинэ суох бу күн сиригэр көтөр-сүүрэр, киһи-сүөһү ырыата-тойуга быстыаҕа! Ахтар айылгы уота омуллубут дьиэ курдук буолан тоҥуо, чоҥкуйуо… Оо, ол алыс сүрүккэтэ бэт буолуоҕа, санаатахха, киһи куйахата күүрэр! Киһи этэ салаһар! Оннук эрэ буолбатын! Күн сырдыга күлүмнээтин! Таптал уота убайдын! Оо, таптал! Таптал барахсан, туругур! Аан дойду айылҕатын итит, иччилээ! Ырыатын-тойугун күүһүрт!
«Сахалыы диктант — 2018″ улуус нэһилиэктэригэр
Навигация: Вернуться на главную страницу