Бу дьыл алтынньы 23 күнүгэр «Олоххо көрдүүбүн дьиктини…» диэн ааттаах, Петр Николаевич Тобуруокап 100 сааһыгар аналлаах, Бүлүү куорат орто сүһүөх кылааһын үөрэнээччилэригэр аһаҕас уруок буолан ааста.Алтан чуораан тыаһынан саҕаламмыт аһаҕас уруок 5-с, 6-с, 7-с кылаас үөрэнээччилэригэр бэрт элбэх арыйыылаах, сэргэх сонуннарынан толору буолан соһутта.
«Күннүүн оонньуур күөрэгэйдэр…» диэн куорат оскуолаларын үөрэнээччилэрин күрэҕин кыайыылаахтара хоһоон ааҕан иһитиннэрдилэр.
Аня Егорова «Күндүттэн күндү кылаат»;
Уйгун Охлопков «Кинигэ»;
Моисей Егоров «Куорат уола хоноһо»;
Алина Романова «Биирдэ мэник туохтаабыт»;
Альсен Слепцов «Попугай»;
Камилла Алексеева «Күөрэгэй»
Аэлита Алексеева «Өскө, наһаа баҕарыаҥ…»
Хоһоон ааҕааччылар сүргэлэрэ көтөҕүллэн, ис сүрэхтэриттэн кыһаллан истээччилэригэр бэртээхэй бэлэх оҥордулар.
Петр Николаевич Тобуруокап 100 сааһыгар аналлаах «Дууһабар сарыалы уматыам…» диэн слайданан презентацияны, «Эйигиттэн күн үөрэр, эҕэрдэлээн мичээрэр…» диэн кинигэ быыстапкатын киин библиотека үлэһитэ М. П. Дмитриева кэпсээн оҕолор билиилэрин хаҥатта.
Кэтэһиилээх ыалдьыттар, Петр Николаевич үөрэнээччилэрэ самодеятельнай композитор, СӨ култууратын үтүөлээх үлэһитэ Владимир Васильевич Васильев, Бүлүүтээҕи спорт оскуола буулдьанан ытыыга тренерэ Николай Николаевич Васильев, дьон билбэт өрүттэрин арыйан, суруйааччы – киһи, учуутал, буойун, булчут, ыал тапталлаах аҕата, эһэтэ диэн өйдөбүллэри киллэрэн, тыыннаан биэрэн, народнай суруйааччы хартыына эрэ буолбатах эбитин итэҕэттилэр.
Бүлүүтээҕи гимназия учууталлара Александра Яковлевна Григорьева, Вера Петровна Томская «уруок иһигэр уруок» ыытаннар, тапталлаах суруйааччыларын тыла-өһө хайдахтаах курдук ис кыахтааҕын ырыттылар, оҕолор толкуйдарын, эйгэлэрин кэҥэттилэр.
Биһиги бары таптыыр, ытыктыыр, талааныгар сүгүрүйэр суруйааччыбыт Бүөтүр Тобуруокап өр сылларга өйбүтүттэн, сүрэхпититтэн сүппэтин диэн санаалаах аһаҕас уруокпутун түмүктээтибит, тэрээһини библиотека ситимин дириэктэрин солбуйааччыта Мария Егоровна Егорова иилээн-саҕалаан ыытта.
Матырыйаалы бэлэмнээтэ кыраайы үөрэтэр отдел кылаабынай бибилэтиэкэрэ М. П. Дмитриева.
Навигация: Вернуться на главную страницу